Një 43-vjeçar me banim në Kamzë, pronar i një biznesi, rezulton i zhdukur prej më shumë se 10 ditësh.
Personi i identifikuar si Ruzhdi Hoxha është zhdukur prej 21 tetorit dhe familja ka bërë denoncimin në polici.
Mësohet se ai është parë për herë të fundit në zonën e Ardenos në Autostradë.
Babai i dy fëmijëve qenë në tavolinën e një lokali me dy persona të tjerë, kur një person, që mendohet se njihej me të e ka thirrur dhe e ka marrë me makinë.
Çfarë filmuan kamerat?
Policia ka verifikuar kamerat e ka zbuluar se mjeti ku hipi Ruzhdi Hoxha është larguar në drejtim të Kamzës e më pas nga Zall Herri. Për gati 7 ditë 43 vjeçar nuk e ka pasur të hapur telefonin, por më pas nga dita e shtunë telefoni i tij është hapur, por nuk është përgjigjur kush.
Rrëmbim?
Familjarët kanë bërë kallëzim tek komisariti nr. 5 dhe hetimet kanë nisur fillimisht për largim nga banesa, por më pas çështja ka kaluar për rrëmbim personi në Drejtorinë e Policisë së Tiranës. Dosja është marrë në hetim nga sektori i hetimit të krimeve të rënda.
Nuk është hera e parë
Nuk është hera e parë që familja bën denoncim për largim nga banesa për 43 vjeçarin. Mësohet se edhe dy herë të tjera familjarët kanë denoncuar largimin e tij nga banesa por që më pas është kthyer vetë, informon gazetari i Ora News, Elton Qyno.
