TIRANE– Lajmi tragjik mbi mbytjen e Armando Hallvaxhiut ditën e sotme teksa zhytej në ujërat e Karaburunit ka pikëlluar jo vetëm familjarët dhe të afërmit e 34-vjecarit nga Tirana, por edhe kolegët dhe njerëzit që e njihnin Armandin apo siç e thërrisnin shkurt Mandi.
Mandi njihej për përkushtimin në punë dhe pasionin që kishte për zhytjen në thellësitë e detit si dhe peshkimin.
Ai kishte vendosur bashkë me disa shokë të shkonte këtë fundjavë në Vlorë dhe të zhytej në thellësinë e bregdetit të Jonit, por fatkeqësisht nuk ka mundur të dalë prej andej dhe është mbytur në vendin e quajtur shpella e ”Haxhi Ali-ut”.
Stafi i News24 dhe BalkanWeb i shpreh ngushëllimet më të sinqerta familjes dhe të afërmeve për humbjen e njeriut të tyre të dashur!
Njoftimi i policisë per ngjarjen:
Më datë 22.04.2018, Salla Operative Vlorë është njoftuar nga një telefonatë se në Karaburun në vendin e quajtur Shpella e ”Haxhi Ali-ut”, është mbytur shtetasi A.H., 34 vjeç, banues në Tiranë, i cili merrej me zhytje. Trupi i pajetë po transportohet në morgun e Spitalit Rajonal Vlorë. Grupi hetimor po punon për sqarimin e plotë të rrethanave të ngjarjes.